IJUMAA SHOWBIZ!

Y-Dash awapiga bao mastaa wa Bongo Flava
Kijana Yassin Habib ‘Y-Dash,’ anayefanya kazi ndani ya kundi la TMK Wanaume Family amewapiga bao baadhi ya wasanii, hasa wa Bongo Flava ambao bado hawajaoa kwa kufanikiwa kufunga ndoa na Bi. Jamila Amsatal, Richard Bukos anashuka nayo.

ShowBiz ambayo ilikuwepo kunako mishemshe hizo zilizofanyika mwishoni mwa wiki iliyopita, ilishuhudia mchizi akipewa shangwe za kutosha na washikaji zake kibao wakiwemo wanaounda kundi hilo ambao walishindwa kujizuia na kuamua kupanda stejini kisha kuangusha shoo ya kutosha wakiongozwa na Rashid Ziara a.k.a KR Mullah.

Y-Dash na mrembo huyo ambaye alikuwa mchumba wake wa ‘longi taim’ waliamua kumaliza ubishi huo kupitia msikiti wa Ilala Bungoni na kufuatiwa na bonge la pati lililofanyika ndani ya Ukumbi wa CCM uliyopo huko huko Ilala, Dar es Salaam. Big up mchizi kwa uamuzi huo wa busara, tunategemea kuona shavu linajaa kwa misosi na ‘malove .

****************************************************

Said Comorien:Tuzo za Dandu zimetolewa ndivyo sivyo
Mwanamuziki na mtayarishaji muziki kutoka ndani ya studio za Big Tyme Production, Said Comorien amesema na safu hii kwamba, ameshangazwa na mchakato mzima wa utoaji tuzo za muziki 2007 (Tuzo za Dandu) ambao umefanyika ndivyo sivyo, Christopher Lissa alichonga naye.

Said alisema kwamba ameshangaa kuona watu waliostahili kutunikiwa ndiyo waliokosa na ambao hawakustahili ndiyo waliotwaa na kwamba amesikitishwa na kitendo cha waandaaji kuingiza uzawa huku wakijali maslahi yao binafsi kitu kinachopoteza maana halisi ya tuzo hizo ambazo ziliasisiwa na marehemu James Dandu.

“Mwaka jana mimi ndiye niliyetayarisha nyimbo nyingi kali, karibuni nusu ya wasanii waliotwaa tuzo au kushiriki kuwania tuzo hizo wametengeneza nyimbo kwangu, lakini cha ajabu mimi ambaye ni prodyuza wao nimeambulia patupu, inakatisha tamaa sana,” alisema Comorien.

Tuzo hiyo iliyokuwa inawaniwa na watayarishaji bora wa muziki ilikwenda kwa Marco Chali kutoka MJ Record.

*****************************************************

Chid Benz: Mimi ndiye King of Hip Hop
Kutoka pande za Ilala, Dar es Salaam ndani ya umoja wenye jina la Lafamilia, msanii anayeshiriki kunako shindano la Ijumaa King Of Hip Hop, Rashid Abdallah Makwilo ‘Chid Benz’ alisema na safu hii kwamba, yeye ndiye mwenye uhakika zaidi wa kuibuka na taji hilo, Eunice Macha na Chausiku Omary walicheki naye.

Mchizi alitamba kuwa, anao uhakika mkubwa wa kuibuka na ufalme huo kwasababu hivi sasa jamii na game nzima ya Hip Hop vimemkubali ile mbaya kuliko hata wasanii wengine waliyopo ndani ya mradi huo.

“Washiriki wote ni wazuri lakini naamini kwamba hata wao wanajua mimi ni mkali zaidi yao, ndiyo maana nina uhakika mkubwa wa kushinda, hilo sina wasiwasi nalo. Siwezi kusema namuogopa msanii fulani, hilo ni shindano lazima liwe na mshindi namba moja na kuendelea. Hivyo mimi kama mimi ninaimani nitafanya vizuri ila siwezi kusema mkali zaidi ni yupi,” alisema Chid.

Aidha, msanii huyu aliwataka wale wote ambao watashiriki kupiga kura wawe makini, wasiwe na ubinafsi kwasababu huo ni mpambano na katika mpambano ni lazima bingwa apatikane. Mratibu wa Shindano hilo, Charles Mateso aliwataka wasomaji kumchagua msanii wanayeona anapaswa kutwaa taji hilo.

Kupitia ujumbe mfupi (SMS) unaandika neno HP, unaacha nafasi unaandika jina la msanii unayeona anastahili kuwa mshindi, kisha unatuma kwenda namba 15551.

Wasanii wamaopigiwa kura katika shindano hilo ni Chid Benz, Kalapina, Profesa Jay, Fid Q, Langa, Kala Jeremiah, Rado, Johmakini, Lord Eyez na Black Rhino.