MISS MATATANI BAADA YA FUMANIZI!

Na Imelda Mtema
Siku chache baada ya kumfumania Miss mwenzake, Mrembo wa Utalii mkoa wa Tanga 2005, Ania Saidi amekumbwa na balaa kubwa baada ya kubondwa na kuumizwa vibaya na kundi la watu wasiojulikana.

Tukio hilo la kusikitisha limetokea usiku wa Julai 31, mwaka huu Mwananyamala jijini Dar es Salaam.

Akiongea na mwandishi wetu, Ania ambaye ni Miss Ngorongoro Crater na aliyewahi kushika mataji ya Miss Ubungo namba 2 mwaka jana, alipatwa na kimbembe hicho alipokuwa ameenda eneo hilo kumpitia rafiki yake.

“Nilikuwa nimeenda kumpitia rafiki yangu ili tuweze kwenda kwenye sherehe ya kuzaliwa rafiki yetu anayeishi Mikocheni,” alisema Ania.

Alisema alikodi gari dogo (taxi) kutoka nyumbani kwake Sinza Palestina hadi Mwananyamala na alipofika maeneo anayoishi rafiki yake huyo dereva huyo aliegesha gari naye kuteremka.

“Dereva alinishusha eneo hilo kwa sababu gari lake halikuweza kufika katika eneo analoishi rafiki yangu huyo”, alisema mrembo huyo.

Mrembo huyo aliongeza kuwa baada ya kushuka na kupiga hatua tano alistukia amekabwa koo na kupigwa na kitu kizito kichwani kabla ya kuanguka chini.

Akiwa chini, miss huyo alisema kuwa, alifanikiwa kuwaona vijana watatu ambao walimpora pochi yake iliyokuwa na cheni pamoja na simu vyote vikiwa na thamani ya shilingi 750, 000.

Hata hivyo, alisema aligoma kutoa vitu hivyo lakini alizidiwa nguvu baada ya mmoja wao kuchomoa kisu na kumkata mkononi huku wakimchania nguo na kumfanya abaki nusu uchi.

Alisema kuwa, baada ya tukio hilo vijana hao walikimbia na kumwacha akiwa na maumivu makali mwilini.

“Nilinyanyuka na kujikongoja hadi kwa rafiki yangu na kupiga simu kuwapa taarifa ndugu zangu akiwemo mchumba wangu,” alisema mrembo huyo.

Alisema kuwa, mchumba wake alifika kwa rafiki yake ambapo alimchukuwa na kumpeleka katika Hospitali ya Mico, Sinza jijini Dar es Salaam kwa matibabu.

Ania alisema kuwa, anahisi vijana hao walitumwa na wabaya wake kumfanyia kitu mbaya, kwani wakati wakimpiga aliwasikia wakitoa maneno ambayo aliamini kuwa walikuwa wametumwa na mtu fulani.

Hivi karibuni Ania aliripotiwa kumfumania miss mwezake aliyefahamika kwa jina la Nadia Mohamed, Msasani Club jijini Dar es Salaam.



WEMA, KANUMBA KUKOMBA TSH. 180,000,000

Na Mwandishi Wetu
Miss Tanzania 2006/07 Wema Sepetu na Msanii wa Maigizo nchini, Steven Kanumba huenda wakakomba kiasi cha shilingi za Kitanzania milioni 180 endapo watashinda kesi watakayoifungulia kampuni inayochapa gazeti hili Global Publishers & General Enterprises.

Uwezekano huo wa kuukwaa utajiri wa chapchap umekuja, kufuatia wawili hao wiki iliyopita kuiandikia barua kampuni hiyo na kudai pesa hizo wakidai kuwa wamechafuliwa majina lao.

Katika barua mbili tofauti kwa kampuni hiyo ambayo imetolewa na Rattansi & Company, Advocates na kusainiwa na wakili wake Nasir H.Rattansi, Wema na Kanumba wanadai kuwa habari mbili zilizochapishwa na gazeti hili kwa matoleo yake namba 400 la Julai 18 na namba 403 la Julai 28 mwaka huu zimewadhalilisha.

Barua ya kwanza iliyokuwa ikilalamikia gazeti hili, ilihusu habari iliyosema kuwa ‘Wema, Kanumba wabambwa laivu’. Kwa mujibu wa habari hizo, wawili hao walionekana usiku katika Ukumbi wa Mercy Club, walikokwenda kuhudhuria sherehe ya kuzaliwa kwa msanii wa Kaole Rachel Kongojole.

Ilidaiwa kuwa Wema na Kanumba walishindwa kuingia ukumbini humo na kutulia kwavile walistuka baada ya kudokezwa kuwa kulikuwa na waandishi wa habari.

Hata hivyo, barua ya wakili wao ilidaiwa kuwa Si Wema wala Kanumba aliyekuwepo ukumbini humo siku hiyo, hivyo kudai fidia ya shilingi milioni 90.

Katika habari ya pili ambayo pia fidia ya shilingi milioni 90 inadaiwa, iliyomhusu Wema pekee na kupewa kichwa cha habari, ‘Hata aoshwe vipi, Wema hatakati’, ilidaiwa kuwa mrembo huyo ni miss wa kwanza nchini kukumbwa na kashfa nyingi za ngono.

Barua ya wakili wa Wema ilidai kuwa mteja wake si mhuni ‘kihivyo’ hivyo kulitaka gazeti hili kukanusha na kulipa fidia ya kiwango hicho cha pesa.