IJUMAA SHOWBIZ!

Kala aibuka na viatu rangi mbili, ajifananisha na Kriss Kross!
Kutokana na ushindani uliyopo kunako sanaa mbalimbali ikiwemo game ya muziki wa Bongo Fleva unawafanya wasanii wengi kuwa wabunifu ili kuwavutia mashabiki wao, kitu ambacho kimewafanya baadhi yao kufanikiwa.

Kala Jeremiah ni miongoni mwa mastaa wa Bongo Fleva ambaye ameibuka na kali ya mwaka kwa kuvaa viatu vyenye rangi mbili tofauti (chekundu na cheusi) ikiwa ni staili yake mpya ya uvaaji baada ya kupotelea Uganda kwa kipindi fulani kabla ya kurudi Bongo na ngoma kadhaa.

“Kaka nimeamua kuja kivingine kama walivyokuwa Kriss Kross, siunajua tena mambo ya ubunifu, lazima kwenye game uwe mjanja,” alisema Kala ambaye wiki iliyopita ameachia ngoma yake mpya yenye jina la Miss Uganda itakayofuatiwa na video yake ambayo pia imepigwa pande hizo za UG.



Rihanna Ashitua na ‘Tattoo’ ya bastola!
Staa wa muziki ambaye chati yake bado iko juu, Rihanna Fenty amebadilisha tattoo aliyokuwa nayo kwenye paja na kuweka mpya yenye mchoro wa bastola ambayo imeonesha kuwashitua wengi huku baadhi yao wakidhani huenda akawa na hisia za kuwa mjeshi hapo baadaye.

Mrembo huyo mwenye umri wa miaka 22- ambaye anatamba na ngoma yake, ‘Te AMO’ mwishoni mwa wiki iliyopita akiwa katika fukwe za Hawaii alionesha mwili wake ukiwa katika hali mpya hasa baada ya kubadilisha tattoo hiyo ya bastola.
Kwa mujibu wa Gazeti la ‘The Sun,’ Rihanaa (kama anavyoonekana pichani), alionesha mwili wake alipokuwa amevalia vazi la ufukweni ‘bikini’.

Hata hivyo, mashabiki wa staa huyo wametakiwa kutomhofia kuhusu tatoo hiyo kwani ametumia hina kuchora na huenda ikawa ni ya muda tu.
Lakini pia wapo waliosema kwamba, huenda tattoo hiyo ameichora kwa sababu ya filamu yake mpya, ‘Battleship’ ambayo ipo katika maandalizi ya nguvu.

FM Academia Kumtambulisha Hafsa Kazinja Idd Mosi
Msanii Hafsa Kazinja anatarajia kutambulishwa rasmi siku ya Idd Mosi wakati Bendi ya muziki wa dansi, FM Academia ‘Wazee wa Ngwasuma’ itakapokuwa inazindua albamu yao ya pili, Vuta Nikuvute Mathematics Mayemba ndani ya Ukumbi wa Diamond jubilee.

Akipiga stori na ShowBiz juzi pande za Mwanayamala katika kambi yao ‘Prezidaa’ wa Ngwasuma, Nyoshi El- Saadat alisema kwamba kupitia uzinduzi wa albamu hiyo wamepania kuweka historia isiyofutika kwa mashabiki wote watakaohudhuria shoo hiyo kutokana na maandalizi ya kufa mtu waliyoyafanya.

“Tutamtambulisha malkia mpya wa Ngwasuma, Hafsa Kazinja ambaye ataziba nafasi ya muimbaji wetu wa kike aliyeachana na shughuli za muziki na kujikita zaidi kwenye masuala ya kulea familia zaidi. Kutoka Kenya msanii David Mathenge ‘Nameless’ atakuwepo kwa ajili ya kutusapoti,” alisema Nyoshi.

compiled by mc george/ijumaa