HII NI LAANA TUPU !

Na Mwandishi Wetu

Hii sasa ni laana tupu! Akina mama ambao majina yao hayakuweza kufahamika mara moja hivi karibuni walitoa kali ya mwaka baada ya kupandwa na mdadi wa muziki na kufikia hatua ya kuvua nguo hadharani.

Tukio hilo la aina yake lilitokea mwishoni mwa wiki iliyopita mchana kweupe katika maeneo ya Manzese Tip Top, jijini Dar es Salaam ambako kulikuwa na sherehe ya kumtoa nje mtoto aliyekuwa akitimiza siku arobani.

Chanzo chetu cha habari kilichokuwa katika eneo la tukio kilishuhudia akina mama hao wakipanda jukwaani kushindana kukata viuno huku wengine wakishindwa kuzuia mizuka yao na kujikuta ‘wakichojoa’ nguo na kubaki uchi wa binadamu.

Kufuatia tukio hilo, baadhi ya wananchi hasa wenye heshima zao waliohudhuria sherehe hizo, walilazimika kuziba nyuso zao na wengine kuondoka eneo hilo kukwepa aibu.

“Hii ni hatari, yaani mwanamke na akili zake anafikia hatua ya kuvua nguo mbele ya kadamnasi bila hata chembe ya aibu, nadhani kuna kila sababu ya sherehe kama hizi kupigwa stop,” alisema Bi. Aisha Shabani mkazi wa Manzese jijini Dar es Salaam.

Aliongeza kuwa, sherehe hizo ambazo wanawake hupanda juu ya meza na kukata mauno huku wakionesha sehemu zao nyeti (Kusasambua) ni miongoni mwa mambo yanayochangia kumomonyoka kwa maadili ya nchi yetu.

“Wewe fikiria mwanamke anavua nguo huku watoto wadogo wakishuhudia, unatarajia kizazi cha baadaye kitakuwaje? Mbaya zaidi sasa watoto hao wanashangilia na kuona ni sawa, kwa kweli inaudhi,”alisema mama huyo kwa masikitiko.

Vitendo vya wanawake kuvua nguo wakipandwa na midadi katika sherehe za kutoa mwali, kicheni pati na nyingine za namna hiyo, hasa kwa baadhi ya makabila, vimekuwa vikiripotiwa mara kwa mara hali inayoonesha kuwa, vichwa vya wengi wao vimetawaliwa na ulimbukeni.

Hata hivyo Amani linaiomba serikali kuhakikisha kuwa, sherehe kama hizo ambazo kwa namna moja ama nyingine zinakwenda kinyume na maadili ya kitanzania zinadhibitiwa.

Joti wa Ze Commedy apigwa stop

Kumezuka tafrani kubwa baina ya wazazi na watoto wanaoiga utukutu na vituko vya mwigizaji Lucas Mhuvile ‘Joti’ kiasi cha kufikia hatua ya kumpiga stop mchekeshaji huyo asiharibu tabia za watoto.

Stop hiyo ya wazazi ni mwendelezo wa ile ya wazanzibari ambao nao walimjia juu hivi karibuni msanii huyo kufuatia maneno yake ya mdebwedo na kubonyeza kizenji ambayo yalitafsiriwa kuwakejeli watu wa visiwani.

Wanzazibari hao walieleza kuwa, jinsi msanii huyo anavyoyatumia maneno hayo yanawafanya baadhi ya watu kuamini kuwa wao ni legelege.

“Sisi tunamuomba Joti aache kutunga na kutumia maneno ambayo kwa namna moja ama nyingine yanawadhalilisha baadhi ya watu na akiendelea na tabia yake hiyo, kwa kweli tutamtolea uvivu,” alisikika kijana mmoja mwenye asili ya Zanzibar akisema.

Aidha Amani limeshuhudia wazazi kadhaa, jijini Dar es Salaam, wakiwacharaza bakora watoto wao baada ya kuwaona wakiigiza miondoko ya mchekeshaji huyo aliyejizolea umaarufu mkubwa hapa nchini.

“Nimemtandika (fimbo) kwa sababu hana adabu, nilimtuma maji, eti anatembea kijoti joti, unajua huyo Joti anatuharibia watoto,” alisema mama Jackson Mkazi wa Sinza, Dar es Salaam.

Kundi la sanaa la Ze Commedy linalorusha kazi zake kupitia kituo cha East African Television, linaundwa na wasanii kibao akiwemo Joti, Mpoki, Masanja, Macregan na Wakuvwanga.