IJUMAA SHOWBIZ!

K-Sher “Mac Regan siyo mpenzi wangu”
Akiwa bado anawakilisha kunako tamasha kubwa la ZIFF litakalomalizika kesho Visiwani Zanzibar, msanii Khadija Shaban a.k.a K-Sher amesema na ShowBiz kwa njia ya simu kwamba amesikitishwa na uvumi unaoenezwa na baadhi ya watu kwamba yuko katika uhusiano wa kimapenzi na msanii wa Orijino Komedi, Alex Chalamila a.k.a Mac Regan.

Akipiga stori na safu hii kwa njia ya simu kutoka pande hizo huku akionesha kuwa na huzuni, K-Sher ambaye ni msanii bora wa kike 2008-2009 alisema kwamba, amesikitishwa na baadhi ya watu wanaoeneza uvumi huo kikiwemo chombo kimoja cha habari (siyo cha Kampuni ya Global Publishers) ambao wamesababisha ahitilafiane na boifrendi wake.

“Mac Regan ni rafiki yangu wa kawaida kama walivyo wasanii wengine wa kiume, sina uhusiano naye wa kimapenzi, nataka watu watambue kwamba mimi nina ‘boifrendi’ wangu huku Zanzibar (hakumtaja jina), taarifa hizo zimemsikitisha hata yeye na watu wengine wanaomzunguka,” alisema msanii huyo ambaye siku chache zijazo anatarajia kuitambulisha albamu yake, yenye jina la ‘K-Sher’ pande za Arusha.

********

Marco chali kusepa MJ Record
Kutoka pande za Masaki Dar es Salaam zilipo Studio za Mj, ShowBiz ilidondoshewa ishu kwamba mtayarishaji muziki maarufu anayepiga mzigo katika mjengo huo, Marco Chali, huenda akala kona baada ya mkataba wake kumalizika juzi Jumatano, Zubagy Akilimia anaanguka na ishu hii.

Baadhi ya wadau wa burudani Bongo waliopo karibu na prodyuza huyo mkali wa Bongo Flava (ambao hawakupenda kutaja majina yao), walisema na safu hii kwamba kwakuwa mchizi hivi sasa jina lake lipo juu kuna uwezekano mkubwa akasepa katika studio hiyo na kwenda kutafuta mkwanja mrefu zaidi baada ya kumaliza mkataba wake na mmiliki wa studio hizo, Joachim Kimaryo a.k.a Master J.

Baada ya kupata data hizo, safu hii ilifunga safari mpaka ndani ya MJ Records na kupiga stori na Marco Chali kuhusiana na ishu hiyo ambapo alisema kwamba. “Ni kweli mkataba wangu ambao nilisaini Julai, 01, 2007 unaisha Julai 01 2009, namshukuru Mungu na napenda kuwaambia bado mi ni tunda la MJ Records, endapo bosi wangu ataridhia nitasaini mkataba mwingine wa miaka miwili, zoezi ambalo linaweza kufanyika mwishoni mwa wiki hii”.

***********

saili kwa wasanii kuendelea mikoani
Baada ya wasanii wengi chipukizi kujitokeza katika usaili wa kutafuta vipaji vitakavyoshiriki kucheza filamu zinazoandaliwa na Kampuni ya Tollywood, Dar es Salaam wiki hii, zoezi linaendelea katika mikoa mingine zilikotolewa fomu za ushiriki.
Kwa mujibu wa Mkurugenzi wa filamu wa kampuni hiyo, Hamie Rajab, mkoa utakaofuata ni Morogoro ambapo zoezi la usaili kwa wasanii waliochukua fomu litafanyika Julai 7 na 8 mwaka huu, ikifuatiwa na Tanga ambako usaili utafanyika Julai 10 na 11, kisha Arusha Julai 13 na 14.

“Baada ya Arusha utafuata Mkoa wa Mwanza, usaili utafanyika Julai 17 na 18, tutamalizia na Zanzibar Julai 21 na 22 kisha washindi watakaopatikana watakutana Dar es Salaam kwa ajili ya kufanyiwa intavyuu ya mwisho kabla ya kuanza zoezi la upigaji picha wa filamu ya ‘Tears On Valentine Day’ Agosti mwaka huu,” alisema Hamie Rajab.

************

Mike T kitambi hichooo!
Miongoni mwa mastaa wa muziki wa kizazi kipya ambao wamenenepeana ghafla ni pamoja na Mike Mwakatundu a.k.a Mike T au Mnyalu, ambaye hivi sasa anaonekana kuwa na kitambi kwa mbali tofauti na ilivyokuwa miaka michache iliyopita, ShowBiz imelicheki hilo, Edna Katabalo anashuka nayo.

Inaonekana mchizi hivi sasa michongo imekaa sawa japokuwa yuko bize na familia yake baada ya kufunga ndoa hivi karibuni na kufanikiwa kupata bebi mmoja. Akiwa ni mwajiriwa wa Kampuni ya simu za mkononi, Zain pande za Morogoro. Mnyalu amesema na safu hii kwamba, kimya chake kunako gemu ya muziki hakijasababishwa na kuishiwa mistari bali ni ajira aliyonayo.

“Ukichanganya ajira na majukumu ya kifamilia niliyonayo nakosa muda mzuri wa kukaa na kuandika mashairi ukizingatia kuwa inanipasa kufanya kazi ambayo itanipatia kipato kizuri kitakachoniwezesha kutunza familia yangu, huu siyo wakati wa kuuza sura,” alisema Mnyalu.

***********

Fid Q “Usinikubali haraka ni ishu ya kweli”
Kama ulikuwa haufahamu , ShowBiz inakuhabarisha kwamba, ngoma mpya ya msanii Fareed Kubanda a.k.a Fid Q (anayeonekana katika picha ya ukweli hapo juu), ‘Usinikubali haraka’ ambayo imemshirikisha Seif Shaban ‘Matonya’ ni ishu ya ukweli ambayo imemtokea na hivi sasa yuko bega kwa bega na mrembo aliyekuwa akimsumbua mpaka kufikia hatua ya kumuandikia mashairi hayo.

********

Mkali wa mwezi monthly best performer
Baada ya kushuhudia ushindi wa msanii Marlaw mwezi uliopita, shindano bado linaendelea kwa kumsaka mshindi wa mwezi huu (Julai).

ShowBiz inakupa nafasi wewe msomaji na mpenzi wa burudani Bongo utuambie unadhani staa gani anastahili kuwa bora kwa mwezi huu?

Andika ujumbe mfupi (SMS) ukilitaja jina la msanii huyo kisha tutumie kupitia simu namba 0787-110 173. E-mail:mcgeorge@gmail.com.

**************