Mshindi Miss Tanzania Arudisha Taji!

Angela(no. 26) siku ya fainali za Miss Tanzania

Mshindi wa taji la Balozi wa Redd’s katika mashindano ya Miss Tanzania mwaka huu, Angela Lubala amevua taji hilo na kurudisha kwa waandaaji.

Akizungumza Dar es Salaam jana, Angela alisema amechukua uamuzi huo kutokana na imani yake ya dini ya Kikristo, ambapo yeye anaabudu kanisa liitwalo World Alive International Outreach lililopo Sinza, Dar es Salaam.

Alisema amefikia uamuzi huo bila kushawishiwa na mtu na anaona halitakuwa jambo la busara kuendelea kuwa Balozi wa kinywaji cha Redd’s, wakati imani ya dini yake haimruhusu.

Balozi wa Redd's wa mwaka jana, Victoria Martin, akijiandaa kukabidhi 'mikoba' kwa Angela

“Nachukua fursa hii kuiambia jamii kuwa kutokana na imani yangu katika Yesu Kristo, sitaweza kuwakilisha Redd’s kama Redd’s Fashion Ambassador 2008.

“Kwa kuwa mimi si mbinafsi, narudisha taji hili na zawadi zake zote kwa Redd’s, napenda kutoa shukrani zangu za dhati kwa Vodacom, Lino na Redd’s kwa uelewa juu ya uamuzi wangu huu”, alisema. Vodacom ndio wadhamini wakuu wa Miss Tanzania. Angela ambaye pia ni Miss Temeke 2008, alisema zawadi anayorudisha ni fedha sh. Milioni 2.5.

Alipoulizwa kama hakujua wakati anashiriki mashindano hayo tangu mwanzo kama kuna jambo kama hilo, alisisitiza kuwa suala la kuwa Balozi wa kinywaji hicho haliendani na imani yake.

Balozi wa Redd's wa mwaka jana Victoria Martin, akikabidhi 'mikoba' kwa Angela(kulia)

Mkurugenzi wa Lino International Agency inayoandaa mashindano hayo, Hashim Lundenga alipoulizwa jana kwa simu alisema yupo nje ya Dar es Salaam, lakini wasaidizi wake pamoja na watu wa Redd’s ambao ni Kampuni ya Bia Tanzania (TBL), wamethibitisha ni kweli amerudisha taji hilo na kuwa atatoa ufafanuzi zaidi atakaporudi.

Angela Luballa

Mashindano ya Miss Tanzania yalifanyika Agosti 2 ambapo Nasreem Karim (22) ambaye ni Miss Kanda ya Ziwa aliibuka Miss Tanzania 2008 na kuzawadiwa pia gari aina ya Suzuki Grande yenye thamani ya sh. Milioni 42 na fedha taslimu sh. Milioni 8.8.

(kwa wasiofahamu, baba mzazi wa Angela ni mchungaji wa kanisa mwenye imani ya kilokole)

(credits- spoti starehe, Sun 10, 2008)