IJUMAA SHOWBIZ!!!

Cpwaa Aachana na Bongo Flava

Baada ya kuongoza mapinduzi katika game ya muziki wa kizazi kipya kwa ngoma zake, ‘Pwaa part 1 na 2, msanii Ilunga Kharifa ‘Cpwaa’ amesema na ShowBiz kwamba ameamua kuachana na Bongo Flava ili aende kimataifa zaidi kwa kuandika mashairi kwa lugha ya Kiingereza ili aweze kueleweka sehemu mbalimbali duniani.

Mchizi alisema kwamba, ameamua kubadilika baada ya kugundua kwamba, game ya Bongo Flava imekuwa ikipiga ‘maktaim’ kwa miaka mingi bila kusonga mbele, huku baadhi ya wenzetu kutoka Afrika wakipasua anga na kupiga mzigo kimataifa zaidi kama P-Square wa Nigeria, HHp wa Afrika Kusini, Akon, K’naan na wengine.

“Kwa kuaza tayari nimeachia ngoma mbili mpya kwenye mtandao, Problem na Revenge ambazo nimeimba kwa Kiingereza na Kiswahili kidogo. Sababu ya kuanza kuachia nyimbo kwenye ‘intaneti’ kabla ya redioni ni kwamba kule kuna soko la kimataifa, pia ni njia rahisi ya kusambaza kazi kuliko njia yoyote, siku chache zijazo baada ya kukamilisha video zake nitaachia wimbo mmoja redioni. Wasanii tusiogope kujaribu,” alisema Cpwaa. Mengi zaidi kuhusu yeye endelea kucheki na sisi.

************

Mshindi ni Irene Uwoya

Mambo vipi wapenzi wa shindano hili, ‘Ijumaa Sexiest Girl’, hii hapa ni Ijumaa nyingine bomba ambayo mlikuwa mkiisubiri kwa hamu kubwa ili kufahamu ni nani kati ya Wema Sepetu na Irene Uwoya atafanikiwa kuibuka na ushindi.

Baada ya wiki iliyopita kushikwa na kigugumizi cha kumtaja mshindi ili kuweka mazingira mazuri ikiwemo zawadi, kwa heshima na taadhima na kwa mujibu wa majaji wetu (wasomaji na wapenzi wa shindano hili) leo tunatamka kwaba, mshindi ni Irene Uwoya.

Kwa mujibu wa Mratibu wa shindano hili, Oscar Ndauka, Irene Uwoya amekuwa akiongoza kwa kura nyingi zaidi tangu mpambano huo ulipoanza, ndiyo sababu iliyomfanya leo aibuke na ushindi huo akifuatiwa na Wema Sepetu.

“Baada ya kuibuka na ushindi huo kisha kupewa heshima ya kuwa mrembo mwenye mvuto wa kimapenzi wa gazeti hili, Irene pia atapata fursa ya kufanya ‘shopingi’ ya nguvu ndani ya duka la mavazi ya kisasa, Zizzou Fashions lililopo Sinza, Dar es Salaam kama zawadi.

“Tunawashukuru wote waliyofanikisha shindano hili kukamilika kwa mafanikio, wakiwemo wasomaji na wapenzi wa mpambano huu ambao kwetu sisi ni kama majaji. Pia tunaheshimu mchango wa washiriki wote waliokuwa ndani ya shindano hili tangu mwanzo hadi hii leo ambapo tunamtaja mshindi,” alisema Ndauka.

**********