WIKIENDA SHOWBIZ!

Movie Star Scouting inakuja
Kampuni inayokuja juu kunako tasnia ya filamu Bongo, Tollywood Movies, imeandaa shindano la kijanja ‘Movie Star Scouting’ ambalo litakuwa linaibua vipaji vya waigizaji chipukizi nchi nzima na kuviendeleza kupitia filamu mbalimbali itakazokuwa inaziandaa na kuwafanya star.

Kwa mujibu wa msimamizi wa ishu hiyo kutoka Tollywood, Hamie Rajab, shindano hilo linatarajiwa kuanza hivi karibuni kwa kuishirikisha mikoa yote nchini ambapo washiriki watatakiwa kununua fomu za ushiriki zitakazotolewa na kampuni hiyo na kuzijaza kabla ya kufanyiwa usaili.

“Washindi watakaopatikana mikoa watakuja Dar es Salaam kwa ajili ya kushiriki fainali kubwa ambapo washindi wawili wa juu watapata nafasi ya kushiriki katika filamu zinazoandaliwa na Kampuni ya Tollywood ikiwemo filamu mpya ya ‘Siku za Mwisho za Uhai Wangu’ ambayo pia itawashirikisha mastaa kama Ray, Kanumba, Johari na Jokate,” alisema Hamie.

Aidha Hamie, ambaye ni mwandishi mkongwe wa filamu za Kibongo, alisema kwamba fomu za kushiriki zitauzwa kwa shilingi 5,000. Kampuni ya Tollywood ndiyo watengnezaji wa ‘muvi’ zilizotamba sokoni kama Fake Pastors na From China With Love. Kama wewe unadhani una kipaji cha kuigiza huu ndiyo wakati wako wa kuwa staa wa filamu Afrika. Kaa tayari kwa taarifa kamili.

**********************************

FELLA: Wanaume Kazini ndiyo inafuata
Baada ya kufunga mwaka 2008 kwa mafanikio, kundi la muziki wa kizazi kipya, TMK Wanaume Family sasa linafungua ukurasa mpya kwa mwaka huu kwa kuachiwa jiwe jipya lenye jina la ‘Wanaume Kazini’.

Meneja wa kundi hilo, Said Fella alisema kwamba tayari ngoma hiyo imeshadondoka hewani kupitia vituo kadhaa vya redio huku video yake ambayo tayari imekamilika ikiwa inafuatia siku chache zijazo.

“Tulikuwa tunamsapoti Mh. Temba kwanza kwa kuachia kazi zake kadhaa ikiwemo ‘Maneno yanawafunza’ na sasa ni zamu ya kundi ambapo ujio huu ndiyo utakuwa ni moja kwa zote, yaani ni mawe juu ya mawe mpaka albamu yetu ambayo tumeipa jina hilo hilo ‘Wanaume kazini’ itakaposimama,” alisema Fella ambaye pia tayari amekamilisha albamu yake yenye jina la Mkubwa na Wanae.

*******************************

THE GAME, CAM’RON WAMEWAHI KUJIACHIA NAYE
Aliwahi kudondoka Bongo miaka kadhaa iliyopita, akapiga shoo moja ya kutosha pande za Kunduchi Beach na kuacha kahistoria fulani. Namzungumzia staa wa R&B Mya Harrison (pichani) ambaye kupitia hapa ‘Ebwana Dah!’ baadhi ya wasomaji wamependa kufahamu aliwahi kuwa na uhusiano wa kimapenzi na mastaa gani wa kiume.

Kama kawa, mtandao unaodili na ishu za uhusiano wa kimapenzi kwa mastaa wa nje umewataja mastaa wa kiume waliyowahi kujiachia na Mya, mmoja baada ya mwingine kwa kuanzia na mwanamuziki Cam’ron.

Staa wa pili aliyewahi kula raha na Mya ni rapa The Game akifuatiwa na mwana Hip Hop wa siku nyingi, Silk The Shocker ambaye alijirusha na mwanadada huyo tangu 1996 mpaka 2000. Baada ya hapo mtandao huo haujaweka wazi hivi sasa mrembo huyo ni mali ya nani.

Kihistoria Mya ambaye nyota yake ni Punda alizaliwa Oktoba 10, 1979 pande za Greenbelt, Maryland, Marekani na kupewa jina la Mya Marie Harrison. Akiwa na urefu wa futi 5 na nchi 5 na nusu, binti huyo alipata elimu yake ya juu katika Chuo cha Eleanor Roosevelt kilichopo huko huko Marekani.