IJUMAA SHOWBIZ!

Roho sita Yasubiriwa kwa hamu kubwa
Muvi mpya ya kutisha ambayo inatarajiwa kufanya mapinduzi makubwa kunako game ya filamu za Kibongo, ‘Roho Sita’ itakayodondoka kitaaani Julai Mosi mwaka huu tayari imeanza kuwavutia wapenzi wengi ambao wameonesha kuisubiri kwa hamu kubwa.

Wakipiga stori kwa nyakati tofauti kutoka sehemu mbalimbali nchini, wapenzi hao wa filamu ambao wamekuwa wakifuatilia matangazo ya filamu hiyo kupitia magazeti ya Kampuni ya Global Publishers likiwemo hili walisema kuwa kitu kizuri huwa kinaonekana mapema kupitia matangazo.

“Nimejaribu kufuatilia matangazo ya filamu ya Roho Sita nikagundua kwamba iko juu kwani picha za matukio yaliyomo ndani yake zinazochapishwa kupitia magazetini yenu zinaonesha kuwa ni muvi ambayo imefanyiwa kazi vya kutosha, mimi na familia yangu tunatamani itoke mapema zaidi,” alisema Jacqueline Kombe wa Moshi.

Mkurugenzi wa Filamu za Kampuni ya Tollywood Movies, ambayo imechukua dhamana ya kuisimamia muvi hiyo, Hamie Rajab alisema na safu hii kuwa, amewahi kuangalia sinema chache zilizowahi kuandaliwa hapa Tanzania lakini hakuna iliyokuwa na ubora kama ‘Roho Sita’.

Filamu hiyo ambayo imeandaliwa na Kampuni ya Koga Film chini ya Mkurugenzi wake Thomas Simon, imewashirikisha mastaa kibao wakiwemo Thea na mrembo Chuchu Hans ambao kila mmoja ameonesha uwezo wa hali ya juu na kuifanya sinema hiyo iwe juu.

********

Black Rhino Awafunika mastaa wa Marekani Channel O
ShowBiz inakuhabarisha kwamba, msanii Black Rhino bado anaendelea kukamata chati za juu kunako Kituo cha Televisheni cha Channel O cha Afrika Kusini kupitia video ya ngoma yake, Black Chata.

Akipiga stori na safu hii, Rhino alithibitisha hilo kwa kusema kwamba, wiki ya pili sasa video hiyo inakamata namba moja kunako Top 10 na Top 100 za tv hiyo huku ikizipoteza video vya mastaa mbalimbali wanaofanya muziki Marekani kama Wycleaf Jean na wimbo wake, Touch your Button, huku Alicia Keys na video ya wimbo wake, ‘Another Way’to die akiambulia nafasi ya 11 na wengine kibao.

“Hiyo inaonesha ni jinsi gani muziki wetu unavyozidi kwenda mbali zaidi. Julai mwaka huu namalizia digree yangu ya Biashara na Masoko hapa Chuo Kikuu cha Mzumbe, Morogoro kisha naingia kwenye mchakato wa mzuki rasmi,” alisema Rhino.

****************

Hermy B, Ay Kutafuta kipaji Tanga
Prodyuza bora 2009, Hermes Baric Lyimo a.k.a Hermy B kutoka B. Hitz Records atatafuta kichwa kimoja chipukizi kunako shoo ya msanii Ambwene Yesaya ‘A.Y’ itakayodondoshwa leo ndani ya Ukumbi wa La Cassachika, mkoani Tanga.

Akisema na ShowBiz juzi, msanii huyo alitamka kwamba, baada ya kupiga shoo mbalimbali za nje sasa ameamua kurudi nyumbani Bongo na kufanya ziara katika mikoa kadhaa kwa ajili ya kutoa shukrani kwa mashabiki wake, huku prodyuza wake huyo akitafuta kipaji kwa ajili ya kupiga nacho kazi kwenye studio yake.

“Wiki iliyopita nilikuwa Morogoro, leo Ijumaa nitakuwa Tanga, yote ikiwa ni kupeleka shukrani zangu kwa mashabiki ambao wamenifanya niwe hapa leo. Katika shoo hiyo ya Tanga ambayo nimeipa jina la Usiku wa A.Y & Friends mbali na kuwa na Hermy B, pia tutakuwa na Pancho ambaye pia ni mtayarishaji muziki katika studio hizo za B. Hitz bila kulisahau kundi la Omega Boyz kutoka mkoani humo.

**********