WIKIENDA SHOWBIZ!

Roho sita kudondoka Juni 1, 09

Kutoka ndani ya Kampuni ya Tollywood iliyojitoa muhanga kuwapa sapoti wasanii wanao ’haso’ kunako game ya filamu Bongo kwa kutayarisha, kurudufu na kusambaza sinema Tanzania, kuna habari mpya ambayo itamfurahisha kila mpenzi wa muvi.

Ishu ni kwamba, Tollywood imechukua dhamana ya kuisimamia filamu mpya inayokwenda kwa jina la ‘Roho Sita’ ambayo imeandaliwa kupitia Kampuni ya Koga Film chini ya Mkurugenzi wake Thomas Simon, inayotarajiwa kudondoka mtaani Juni Mosi mwaka huu kama inavyoelekeza kwenye tangazo hapo juu.

Mkurugenzi wa Filamu za Tollywood Movies, Hamie Rajab, alisema na safu hii kuwa, amewahi kuangalia sinema chache zilizowahi kuandaliwa hapa Tanzania lakini hakuna iliyokuwa na ubora kama ‘Roho Sita’.

“Mpaka Tollywood tumeamua kuichukua basi mashabiki waamini kwamba kitu kimetulia, ni sinema ya kwanza ya kutisha ambayo kila kitu kinaonekana halisi, kubwa zaidi ni kwamba ‘program’ iliyotumika katika uhariri ni ya kisasa duniani, ndiyo maana imeifanya kuwa bora wenye kiwango cha Kimataifa,” alisema mkurugenzi huyo.

******************************************

FID Q NA USINIKUBALI HARAKA
Katika kile kinachoonesha kuwa mchizi huwa anapenda kutoka kivyake kupitia ngoma za muziki wa Hip Hop, msanii Fareed Kubanda a.k.a ‘Fid Q ametoka na kazi mpya yenye jina la ‘Usinikubali Haraka’ akimshirikisha kijana kutoka Tanga, Seif Shaban ‘Matonya’, Chile Kasoga anadondoka nayo.

Utofauti ninaouzungumzia kwa Fid Q ni kuwa, wakati wasanii wengi wanaofanya nyimbo za mapenzi wanazungumzia kupenda au kutendwa yeye anakwambia ‘Usinikubali haraka’ ngoma ambayo imefuata baada ya ile video ya wimbo wake, ‘I am Professional’.

“Kazi hiyo imefanyika kupitia Mj Records na huo ni ujio wangu mwingine,” alisema Fid Q.

**********************************

MISS DAR CITY CENTRE KUTOA MISS TZ 2009
Ile safari ya kumtafuta mrembo wa Tanzania (Miss Tanzania 2009) tayari imeanza na moja ya vitongoji ambavyo vipo kwenye mikakati mikali ya kuhakikisha mshindi wa mwaka huu anatoka kwao, ni Dar City Center, kwani tayari kimeanza kuwafua warembo wake kwa spidi mia ishirini ndani ya Ukumbi wa Lamada - Rhobi Chacha alikuwepo mazoezini.

Akipiga stori na safu hii kwa niaba ya kamati yake, Mkurugenzi wa Kampuni ya Sisi Entertainment, ambao ndiyo waandaaji, John Doto, alisema kuwa japo wanaingia kwenye game hiyo kwa mara ya kwanza, wana imani mrembo wa Tanzania mwaka huu atatoka kwao kwakuwa wamekuja na mabadiliko ya kutosha kwenye shindano hilo.

“Tunataka kurudisha heshima ya kitongoji hicho ambayo ilipotea kwa muda mrefu, mabadiliko tutakayokuja nayo ni pamoja na kuwa na warembo wazuri, wenye sifa zote za kuibuka na ushindi wa Taifa ikiwemo kuiwakilisha nchi kwenye shindano la Kimataifa (Miss World),” alisema John kwa kujiamini.

Aidha muandaaji huyo alisema kwamba, hivi karibuni wanatarajia kufanya mchujo kwa washiriki ishirini na moja walionao ili wapatikane wakali watakaoingia mpambanoni siku kadhaa zijazo. Shindano hilo la kumtafuta mrembo wa Kitongoji cha Dar City Centre limedhaminiwa na Global Publishers, Angaza Zaidi na wengine ambao watatajwa hivi karibuni.

*****************************

MISS USTAWI WA JAMII 2009 Yaipaisha Promosheni ya Jishindie Kompyuta 20
Mpambano wa kumtafuta mrembo wa Chuo cha Ustawi wa Jamii cha Dar es Salaam ulimalizika mwishoni mwa wiki iliyopita kwa Mlimbwende Gloria Mayoa kuibuka na ushindi, sambamba na kuinadi Bahati Nasibu ya Jishindie Kompuyuta 20 ya GPL - Musa Mateja alishuhudia mpambano huo.

Shughuli hiyo ilifanyika ndani ya Cafeteria ya chuo hicho, maeneo ya Sinza, Bamaga ambapo mrembo huyo aliwapiga chini vimwana wengine watano ambao pia walionekana wakali jukwaani.

Zoezi zima la kumtafuta mshindi lilianza majira ya saa tatu usiku, huku Kampuni ya Global Publishers ambao ndio walikuwa wadhamini pekee wakipendezesha mpambano huo kwa promosheni inayovuta hisia za wasomi wengi chuoni hapo.

Kampuni ya Global ilitoa ofa kwa mshindi wa kwanza kwenda kupiga kozi ya kompyuta katika Chuo cha Desktop Computer cha jijini Dar. Kwa upande wake Afisa Masoko wa Global, Mahmoud Omary, alisema kuwa kampuni hiyo inathamini mchango wa wasomi hapa nchini kwani ndiyo wasomaji wakubwa wa magazeti ya kampuni hiyo.

*******************

KANYE WEST NA LISTI YA MASTAA WA KIKE ALIOWAPITIA
Mwana Hip Hop Kanye West ndiye staa wa muziki aliyeombwa na wasomaji wengi wiki iliyopita na sisi bila kuwabania leo tunashuka na listi ya mastaa wa kike aliyowahi kujirusha nao, kolamu ya E BWANA DA inakupasha!

Kwa mujibu wa mtandao unaodili na ishu hizo kwa mastaa wa Ulaya, Kanye hana listi ndefu kama ilivyokuwa kwa baadhi ya wasanii waliyopita, amewahi kuwa na uhusiano wa kimapenzi na mademu watano tu.

Mtandao huo ulianza kumbamba mchizi na msichana mwenye jina la Amber Rose, baada ya hapo Kanye alidondokea kwa Alexis Eggleston mwaka 2002, kisha akaja kwa Brooke Crittenton aliyedumu naye kwa mwaka mmoja (2005 - 2006) kabla ya kuwa na mrembo Amelle Berrabah mwaka 2007 - 2008.

Baada ya kutemana na Brooke, Kanye alihamishia majeshi kwa aliyekua demu wake wa siku nyingi, kimwana Jennifer Metcalfe lakini bado mtandao huo haujaweka wazi kama bado yuko naye au wameshatosana.

Mchizi ambaye jina lake kamili ni Kanye Omari West, akiwa na umri wa miaka 31 sasa na urefu wa futi tano na nchi nane, alizaliwa Juni 8, 1977 huko Atlanta, Marekani. Alipiga elimu yake katika shule mbalimbali vikiwemo vyuo viku vya Columbia na Chicago. Ili kufahamu uhusiano wa staa wa nje tuandike ujumbe mfupi (SMS) kupitia simu namba 0787-110 173.

compiled by mc george