WIKIENDA SHOWBIZ!

Mshindi wa Pajero akabidhiwa

Na Mashaka Baltazar, Mwanza
Hatimaye mshindi wa Promosheni ya Jishindie Pajero iliyoendeshwa na Kampuni ya Global Publishers kwa miezi kadhaa, Daudi Nzumbi wa Mwanza amekabidhiwa gari lake na wakala wa kampuni hiyo mkoani humo, Khamis Kikas.

Akiongea mara baada ya hafla hiyo fupi ya kukabidhiwa mchuma wake, Nzumbi ambaye ni mchungaji alisema kwamba anaishukuru Kampuni ya Global Publishers kwa kumuwezesha kumiliki gari jambo ambalo hakulitarajia maishani mwake.

'Nawashukuru Global Publishers kwa kuendesha promosheni hiyo ambayo imenifanya nishinde gari hili, mwanzoni nilikuwa siamini kama inawezekana mtu yeyote kushinda katika bahati nasibu lakini hivi sasa nimekubali kwamba kampuni hiyo si watu wababaishaji bali ni watu makini,' alisema Nzumbi.

Nzumbi anakuwa ni mshindi wa pili kuibuka na gari mwaka huu kupitia bahati nasibu zilizoandaliwa na Kampuni ya Globa Publishers. Mshindi wa kwanza ni Hosea Komanya wa Dar es Salaam ambaye mwishoni mwa mwaka jana aliibuka na gari aina ya Mercedes Benz kupitia Promosheni ya Jishindie Benzi iliyoandaliwa na kampuni hiyo.

****************************

TMK Kudondoka Uswazi
Kundi la TMK Wanaume Family ambalo hivi karibuni limedondosha video ya ngoma yake mpya, 'Wanaume Kazini' linatarajia kuanza ziara ya siku kadhaa katika baadhi ya vitongoji vya Dar es Salaam maarufu kama Uswahilini au 'Uswazi', lengo likiwa ni kutoa shukrani kwa mashabiki wao.

Akipiga stori na safu hii, kiongozi wa kundi hilo, Said Fella alisema kuwa ziara hiyo imepewa jina la 'Kitaa hadi kitaa' na kwa kuanza Ijumaa ya wiki hii watadondoka pande za Yombo Buza na kuangusha bonge la shoo ndani ya Ukumbi wa Ghadafi.

'Siku zote huwa tunatambua kwamba, mashabiki wetu wengi wapo uswahilini, inabidi tuwafuate kwa ajili ya kuwapa shukrani zetu kwa kutupa sapoti ya nguvu tangu kundi lilipogawanyika kwa kutufanya tuendelee kuwepo kwenye game. Siku hiyo tutatambulisha albamu ya Temba, 'Mtoto wa Kichaga' na ya kwangu, 'Mkubwa na Wanawe'. Tukitoka Yombo siku itakayofuata yaani Jumamosi tutakuwa Chanika ndani ya Ukumbi wa GFC Motel, kisha tutaendelea sehemu nyingine,' alisema Fella.

*************************************

Missy Elliot: Amewahi kujiachia na wanawake watano, mwanaume mmoja

Wiki iliyopita kupitia hapa 'Ebwana Dah!' staa wa mitindo, muziki na filamu, Paris Hillton aliwashangaza wengi kwa kitendo chake cha kuwa na uhusiano wa kimapenzi na wanaume 66. Leo hii tunaibuka na kali nyingine inayomuhusu mwanamama mkali wa michano Marekani, Missy Elliot ambaye safari yake kunako uhusiano wa kimapenzi inaweza ikawashangaza wengi pia wakiwemo wasomaji ambao wametamani kujua staa huyo aliwahi kutoka na wanaume maarufu wangapi.

Tunaposema kuwashangaza siyo kama Missy Elliot ana listi ndefu ya wanaume aliowahi kujirusha nao kama ilivyokuwa kwa Paris, bali kwa mujibu wa mtandao unaodili na ishu za uhusiano wa kimapenzi wa mastaa wa nje, mkali huyo amewahi kujihusisha kimapenzi na mastaa wa kike wengi kuliko wanaume (vitendo vya kisagaji).

'Ebwana Dah!' ilifanikiwa kuibamba listi ya mastaa wa kike kibao waliowahi kujirusha na Missy Elliot ambao ni Da Brat, Nicole Wray, Tweet, Faith Evans na Lil Kim. Mtandao huo ulimtaja staa wa kiume mmoja tu, Timbaland ambaye ni prodyuza wake Elliot kuwa ndiye pekee aliyewahi kuwa na uhusiano wa kimapenzi na msanii huyo mkali wa steji.

Pia Missy anaelezewa kusagana na utitiri wa mademu ambao hawana majina makubwa.

Kwa upande wa historia, Missy Ellit mwenye umri wa miaka 37 sasa, ambaye jina lake kamili ni Melissa Arnette Elliot alizaliwa Julai 1, 1971 huko Portsmouth, Virginia, Marekani. Akiwa anapendelea kutengeneza nywele zake kwa rangi ya brown huku rangi ya macho yake ikiwa ni 'dark brown' rapa huyo ana urefu wa futi tano na nchi moja. Hayo ndiyo mambo ya Missy Elliot ambaye bado haijafahamika hivi sasa yuko kunako uhusiano wa kimapenzi na staa gani.

***************************

Wasanii waipokea Movie Star Scouting kwa shangwe
Baadhi ya wasanii chipukizi kunako tasnia ya maigizo nchini, wamelipokea kwa shangwe shindano la kutafuta vipaji vya sanaa hiyo, 'Movie Star Scouting' ambalo linatarajiwa kuanza siku kadhaa zijazo kupitia Kampuni ya Tollywood.

Wakipiga stori na safu hii kwa njia ya simu kutoka sehemu mbalimbali na kwa nyakati tofauti, wasanii hao wamesema kwamba, wanalisubiri shindano hilo kwa hamu kubwa kwani kwa muda mrefu wamekuwa wakijaribu kutafuta njia ya kutoka kupitia sanaa hiyo bila mafanikio.

'Mimi naitwa Jackson nipo Mwanza nilikuwa nauliza hizo fomu za ushiriki zitaanza kutoka lini? Hilo lilikuwa ni swali la msanii huyo. Kwa faida yake na wengine wanaolisubiri shindano hilo kwa hamu kubwa, tarehe ya kusambaza fomu za ushiriki itatangazwa siku chache zijazo kupitia hapa na kwenye magazeti mengine yanayochapishwa na Kampuni ya Global Publishers, hiyo ni kwa mujibu wa Tollywood.

Msimamizi wa mpambano huo, Hamie Rajab amesema kuwa kila kitu kuhusu ishu hiyo kimeshakamilika, kinachosubiriwa ni siku maalum ya kusambaza fomu hizo ambazo zitauzwa kwa shilingi 5,000 kila mmoja. 'Washindi wawili, msichana na mvulana watakaopatikana kwenye fainali za shindano hilo watapata nafasi ya kuingia mkataba wa miaka miwili na Kampuni ya Tollywood na kushiriki kwenye filamu mbalimbali ambazo zitawafanya walipwe shilingi Milioni 10 kila mmoja'.